Uppgjör fyrir árið 2021
Rekstur Búseta byggir á traustum grunni og einkennist af nútímaáherslum í rekstri. Nýbyggingarverkefni Búseta vekja jafnan athygli fyrir hönnun, vandað efnisval og ekki síst áhugaverðar staðsetningar. Í rekstri félagsins er sífellt aukin áhersla á umhverfisvitund og sjálfbærni enda lætur áhugi félagsmanna ekki á sér standa þegar sala fer fram.
Með því að haga starfsemi Búseta á samfélagslega ábyrgan hátt látum við gott af okkur leiða um leið og við stuðlum að heilbrigðum vexti sem er til hagsbóta fyrir félagsmenn og samfélagið í heild. Búseti starfar með sjálfbærni að leiðarljósi til að draga úr kolefnisspori félagsins og umhverfisáhrifum starfseminnar.
Fjárhagur Búseta er traustur, virði eignasafnins hefur aukist og skuldsetning er hófleg. Byggingarverkefni á vegum Búseta á síðustu árum hafa fært félaginu margvísleg verðmæti og hafa staðist áætlanir hvað varðar tíma og fjárhag.
Fjölbreytileiki einkennir Búseta á marga vegu. Það á ekki síst við um þá fjölbreyttu flóru félagsmanna og búseturéttarhafa sem félaginu tilheyra. Með auknum umsvifum er meira umleikis á skrifstofu félagsins tengt þjónustu, upplýsingagjöf og samningagerð. Stjórn Búseta stundar ábyrga og góða stjórnarhætti og hjá félaginu starfar samheldinn hópur starfsfólks.
Fasteignasafn Búseta er afar fjölbreytt hvað varðar gerð, stærð, aldur og staðsetningu og stenst tímans tönn þegar kemur að hönnun og útfærslu. Viðhaldi og endurbótaverkefnum er sinnt af öflugu teymi eignaumsjónar ásamt fjölmörgum traustum verktökum.